Уураг бол бидний биеийн чимээгүй баатрууд юм. Тэд булчингийн эдийг нөхөн сэргээх, дархлааны системийг дэмжих гээд дэндүү олон чухал үүрэгтэй. Гэхдээ бүх уураг адилгүй. Тэдний биеэр дамжих замнал олон янз бас гайхалтай. Одоо уургийн төрлүүдийг бие хэрхэн шингээдэг болон яагаад амьтны уураг давуу талтай болохыг судалж үзье.

Амьтны уураг: Хурдан бас үр дүнтэй

Таныг саяхан сайхан хоол идсэн гэж төсөөлье. Магадгүй чанасан мах эсвэл будаатай хуурга. Сүүлийн халбага хоолоо залгиж амжаагүй байхад л таны бие аль хэдийн идэвхтэй ажиллаж, уургыг амин хүчлүүдэд задалж эхэлсэн байх болно. Эдгээр амин хүчлүүдийг таны биеийг өдөр бүр нөхөн сэргээж барихад бэлэн байгаа төрөл бүрийн барилгын материал гэж төсөөлөөрэй.

Мах, өндөг, сүүнд агуулагддаг амьтны гаралтай уураг бол таны биеийн өөрөө үйлдвэрлэж чадахгүй амин хүчлүүдийг агуулдаг биеийн эд, эсийг бүтээгч барилгын материалын хамгийн чухал түүхий эд юм. Мөн хүний хоол боловсруулах систем амьтны гаралтай уургийг илүү хурдан, үр дүнтэй боловсруулдаг.

Тэр дундаас хамгийн хурдан нь шар сүүний уураг (whey protein) юм. Тийм ч учраас бодибилдинг, фитнессээр хичээллэгчид бэлтгэлийн дараа булчинг нөхөн сэргээхийн тулд өргөн хэрэглэдэг.

Ургамлын уураг: Удаан боловч тогтвортой

Одоо будаа, самар эсвэл киноа зэрэг ургамлын уургуудыг авч үзье. Эдгээр уургууд ходоод гэдэсний системээр илүү удаан дамждаг. Ургамлын уургууд ихэвчлэн чухал амин хүчлүүд дутмаг байдаг тул таны бие хэрэгтэй зүйлээ авахын тулд илүү их хичээл зүтгэл гаргах шаардлагатай болдог.

Гэхдээ удаан байх нь тэдний сул тал биш юм. Ургамлын хүнсэнд агуулагдах эслэг болон бусад нэгдлүүд шингэцийг удаашруулдаг ч тогтвортой, тэнцвэртэй энергийн нийлүүлэлтийг өдрийн турш өгдөг. Энэ нь тойруу болов ч амар замыг сонгон явах аялалтай адил: та хоцорч ирэх боловч илүү жигд, тэнцвэртэй аяллыг мэдрэх болно. Мөн шош, будаа зэрэг ургамлын уургуудыг хослуулан хэрэглэх нь чухал амин хүчлүүдийг бүхэлд нь авах боломжийг олгодог.

Яагаад амьтны уураг илүү вэ?

Тэгэхээр яагаад амьтны уургийг ихэвчлэн давуу гэж үздэг вэ? Хариулт нь үр дүнтэй байдал, бүрэн бүтэн байдалд оршдог. Амьтны уургийг хэрэглэх үед та бие хэрэгтэй бүх чухал амин хүчлүүдийг үр дүнтэй, хурдан шингээж авдаг. Энэ нь булчинг томруулах, дасгалын дараа нөхөн сэргээх болон ерөнхий эрүүл мэндийг хангахад төгс сонголт юм.

Эх сурвалж

Paddon-Jones, D., & Rasmussen, B. B. (2009). Dietary protein recommendations and the prevention of sarcopenia. Current Opinion in Clinical Nutrition and Metabolic Care, 12(1), 86-90.

Phillips, S. M. (2017). Current concepts and unresolved questions in dietary protein requirements and supplements in adults. Frontiers in Nutrition, 4, 13.

van Vliet, S., Burd, N. A., & van Loon, L. J. C. (2015). The skeletal muscle anabolic response to plant- versus animal-based protein consumption. Journal of Nutrition, 145(9), 1981-1991.